റൈറ്റ് സഹോദരന്മാര്‍ (Wilbur Wright-Orville Wright) Wright brothers
വിമാനം കണ്ടുപിടിച്ചത് റൈറ്റ് സഹോദരന്മാരാണ്. 1867 ഏപ്രില്‍ 16ന് വില്‍ബര്‍ റൈറ്റും 1871 ആഗസ്റ്റ് 19 ന് ഓര്‍വെല്‍ റൈറ്റും അമേരിക്കയില്‍ ജനിച്ചു. അച്ഛന്‍ കുട്ടികളുടെ വിദ്യാഭ്യാസത്തില്‍ പ്രത്യേകം ശ്രദ്ധിച്ചു. കഴിയുന്നത് പുസ്തകങ്ങള്‍ അവര്‍ക്ക് വാങ്ങി കൊടുത്തു. അമ്മയ്ക്ക് യാന്ത്രിക ഉപകരണങ്ങള്‍ ഉണ്ടാക്കുന്നതില്‍ വാസനയുണ്ടായിരുന്നു അവരാണ് മക്കള്‍ക്ക് മാതൃകയായത്. 1983 ല്‍ ഓര്‍വെല്‍ ജ്യേഷ്ഠന്റെ സഹായത്തോടെ ഒരു വാര്‍ത്താവാരിക ആരംഭിച്ചു. പിന്നീട് അത് ദിനപ്പത്രമാക്കി. പിന്നെ കുറച്ചുനാള്‍ സൈക്കിള്‍ കടയും റിപ്പയറിങ്ങും നടത്തുകയും ചെയ്തു. 1895-ല്‍ ഒരു ജര്‍മ്മന്‍കാരനെഴുതിയ പുസ്തകം വായിക്കാന്‍ ലഭിച്ചു. ആകാശത്തില്‍ കൂടി ഒഴുകിപ്പോകുന്ന ചില പരീക്ഷണങ്ങളെക്കുറിച്ച് അതില്‍ വിസ്തരിച്ചിട്ടുണ്ടായിരുന്നു. പിന്നീട് എങ്ങനെ ഗ്ലൈഡ് ചെയ്യാമെന്ന് അവര്‍ ചിന്തിച്ചു. അതിനെക്കുറിച്ചുള്ള പുസ്തകങ്ങള്‍ ധാരളം വാങ്ങി വായിച്ചു. പരീക്ഷണങ്ങളും നടത്തി. വിമാനത്തിന്റെ മാതൃകകള്‍ ഉണ്ടാക്കി കാറ്റിന്റെ സഹായത്തോടെ പറത്തി. വിമാനം ചാഞ്ചാടാതെ താഴെയിറക്കാനുള്ള വഴിയും അവര്‍ കണ്ടുപിടിച്ചു. യന്ത്രം കൊണ്ട് പറക്കുവാനുള്ള പരീക്ഷണങ്ങള്‍ അവര്‍ തുടര്‍ന്നു. ഗ്ലൈഡറിനാവശ്യമായ ഒരു ചെറിയ ഗാസൊലിന്‍ എന്‍ജിനും അവര്‍ നിര്‍മ്മിച്ചു. ആദ്യത്തെ യഥാര്‍ത്ഥ പ്രൊപ്പല്ലറായിരുന്നു അവര്‍ നിര്‍മ്മിച്ചത്. ഫ്‌ളെയര്‍ -1 എന്നാണ് അവര്‍ ഉണ്ടാക്കിയ വിമാനത്തിന് കൊടുത്ത പേര്. 1903 ഡിസംബര്‍ 17 ന് കിറ്റി ഹോക്കില്‍ (Kitty Hawk) ഫ്‌ളയര്‍ -1 പറന്ന് പൊങ്ങി. ഓര്‍വെല്‍ റൈറ്റായിരുന്നു പറത്തിയത്. 12 സെക്കന്റുകൊണ്ട് വെറും 120 അടി ദൂരമാണ് പറന്നത്. വീണ്ടും രണ്ടു പ്രാവശ്യം കൂടി അവര്‍ വിമാനം പറത്തി. അമേരിക്കയിലെ പത്രങ്ങളില്‍ ആ പറക്കലിനെക്കുറിച്ച് വന്ന വാര്‍ത്ത ആരും വിശ്വസിച്ചില്ല. അതൊരു കെട്ടുകഥയായി അവര്‍ തള്ളിക്കളഞ്ഞു. തുടര്‍ന്നുള്ള വര്‍ഷങ്ങളില്‍ വിമാനത്തിന് പല പരിഷ്‌കാരങ്ങളും അവര്‍ വരുത്തി. രണ്ടുവര്‍ഷത്തിനുശേഷം യു.എസ് പട്ടാളം ഒരു വിമാനം ആവശ്യപ്പെട്ടു. അത് പരീക്ഷിച്ച് വിജയമാണെന്ന് അവര്‍ തെളിയിച്ചു. ഇംഗ്ലണ്ട്, ഫ്രാന്‍സ്, സ്‌പെയിന്‍ തുടങ്ങിയ നഗരങ്ങളില്‍ അവര്‍ വിമാനം പറത്തിക്കാണിച്ചു. ലോകം അവരെ അനുമോദിച്ചു. നിരവധി ബഹുമതികള്‍ അവര്‍ക്ക് ലഭിച്ചു. തുടര്‍ന്ന് അനുദിനം നടന്ന ഗവേഷണഫലങ്ങളാണ് ഇന്നത്തെ വിമാനങ്ങള്‍ രൂപകല്പന ചെയ്യപ്പെടാന്‍ സഹായകമായത്. 1912 മെയ് 30 ന് വില്‍ബര്‍ റൈറ്റും, 1948 ജനുവരി 30 ന് ഓര്‍വെല്‍ റൈറ്റും അന്തരിച്ചു.
No comments:
Post a Comment