ഒ. എന്‍. വി. കുറുപ്പ്.

 ഒ. എന്‍. വി. കുറുപ്പ്. 

മലയാളത്തിലെ പ്രശസ്ത കവിയായിരുന്നു ഒ. എന്‍. വി. കുറുപ്പ്. ഒറ്റപ്ലാക്കല്‍ നീലകണ്ഠന്‍ വേലു കുറുപ്പ് എന്നാണ് പൂര്‍ണ്ണനാമം.1931 മെയ് 27 ന് കൊല്ലം ജില്ലയിലെ ചവറയില്‍ ജനിച്ചു. അധ്യാപകന്‍, കവി, ഗാനരചയിതാവ്. എന്നീ നിലകളില്‍ പ്രശസ്തനായിരുന്നു. ഒ.എന്‍.വി. എന്ന ചുരുക്കപേരില്‍ അറിയപ്പെട്ടു. 1982 മുതല്‍ 1987 വരെ കേന്ദ്ര സാഹിത്യ അക്കാദമി അംഗമായിരുന്നു. കേരള കലാമണ്ഡലത്തിന്റെ ചെയര്‍മാന്‍ സ്ഥാനവും വഹിച്ചിരുന്നു. നിരവധി സിനിമകള്‍ക്കും നാടകങ്ങള്‍ക്കും ടെലിവിഷന്‍ സീരിയലുകള്‍ക്കും നൃത്തശില്‍പങ്ങള്‍ക്കും ഗാനങ്ങള്‍ രചിച്ചിട്ടുണ്ട്. വാര്‍ദ്ധക്യസഹജമായ അസുഖങ്ങളെത്തുടര്‍ന്ന് 2016 ഫെബ്രുവരി 13 ന് തിരുവനന്തപുരത്തുവച്ച് അന്തരിച്ചു. പ്രധാനകൃതികള്‍ ഭൂമിക്കൊരു ചരമഗീതം, അക്ഷരം, ഉപ്പ്, ഉജ്ജയിനി, വളപ്പൊട്ടുകള്‍, കറുത്ത പക്ഷിയുടെ പാട്ട്, ഭൈരവന്റെ തുടി തുടങ്ങിയവ.മലയാളത്തിലെ ആധുനികകവിതയ്ക്കു ഭാവുകത്വപരമായ പൂര്‍ണ്ണത നല്‍കുന്നതിലും കവിതയെ സാധാരണജനങ്ങളിലെത്തിക്കുന്നതിനും മുന്നില്‍ നിന്നവരില്‍ പ്രമുഖനായിരുന്നു ഒ.എന്‍.വി. സ്വയം ചൊല്ലി അവതരിപ്പിച്ച കവിതകള്‍ ആസ്വാദകര്‍ ഇരുകയ്യുംനീട്ടി സ്വീകരിച്ചു. സാഹിത്യ രംഗത്തെ സംഭാവനകള്‍ പരിഗണിച്ച് 2007ലെ ജ്ഞാനപീഠ പുരസ്‌കാരം ഇദ്ദേഹത്തിന് 2010ല്‍ ലഭിച്ചു. പത്മശ്രീ (1998), പത്മവിഭൂഷണ്‍ (2011) ഓടക്കുഴല്‍ പുരസ്‌കാരം തുടങ്ങി നിരവധി ബഹുമതികള്‍ ലഭിച്ചിട്ടുണ്ട്.